• Description
  • Date
  • Info
Gerum betur - áhrifaríkar aðferðir og helstu hindranir
„Byggjum brýr Brjótum múra", verkefni Jafnréttisstofu um heimilisofbeldi, stendur fyrir áðstefnu um samvinnu í heimilisofbeldi á Íslandi þann 18. október 2018 á Icelandair hótel Reykjavík Natura kl. 10:00–16:00.
Ráðstefna um samvinnu í heimilisofbeldismálum verður haldin þann 18. október 2018 á Icelandair hótel Reykjavík Natura kl. 10.00–16.00. Ráðstefnan er ætluð fagfólki sem vinnur með ofbeldi í nánum samböndum og almenningi sem vill láta sig málefnið varða.

Skráning er hafin á jafnretti.is

Hver er staðan í heimilisofbeldismálum og hver hefur þróunin verið undanfarin ár? Fjallað verður um nokkur fyrirmyndarverkefni, meðal annars verkefnið Saman gegn ofbeldi, samvinnuverkefni í heimilisofbeldismálum með aðkomu fjölbreytts hóps fagsfólks, verklag bráðamóttöku Landspítalans í heimilisofbeldismálum, Heimilisfrið, meðferðarúrræði fyrir gerendur og reynsluna af starfsemi Bjarkarhlíðar.

Kynntar verða nýjar rannsóknir um ofbeldi í nánum samböndum á Íslandi. Meðal annars verður fjallað um rannsókn á upplifun kvenna af sáttameðferð sýslumanns við skilnað, heimilisofbeldi gagnvart fötluðu fólki, reynslu af því að leita sér hjálpar og ná bata eftir ofbeldissamband auk þess sem skoðuð verður staða erlendra kvenna sem hafa upplifað heimilisofbeldi.

Fjallað verður um útvarpsþættina Kverkatak, sem Viktoría Hermannsdóttir og Þórhildur Ólafsdóttir gerðu fyrir Ríkisútvarpið. Þáttastjórnendur ætla að deila með ráðstefnugestum hvernig það var að gera þættina. Í þáttunum var fjallað um heimilisofbeldi, eðli þess, áhrif og afleiðingar.

Í lok ráðstefnunnar verða pallborðsumræður með þolendum heimilisofbeldis þar sem rætt er um hvernig þau upplifa samfélagið og þjónustu hins opinbera við úrlausn vanda þeirra og þær hindranir sem komu upp þegar þau voru að komast út úr aðstæðunum. Einnig verður rætt við þau um hvernig þau sjái fyrir sér að þjónusta hins opinbera geti gert betur við þolendur í heimilisofbeldismálum.

Á ráðstefnunni verður hrint úr vör vitundarvakningunni Þú átt VON sem byggir á reynslu þolenda ofbeldis á því að komast út úr aðstæðunum og þeim úrræðum sem í boði eru.

Hægt verður að kaupa hádegisverð á staðnum fyrir 2.900 kr.
Gott aðgengi er að salnum og aðgangur er ókeypis.

Ekki láta þennan viðburð fram hjá þér fara!


------------------------------------------
Meira um verkefnið:
„Byggjum brýr - brjótum múra“ er verkefni sem vinnur að því að auka almenna þekkingu um heimilisofbeldi, minnka þöggun um málaflokkinn og að fjölga tilkynningum um heimilisofbeldi til lögreglu. Verkefnið er styrkt af Evrópusambandinu og unnið í samstarfi við dómsmálaráðuneytið, Lögregluna á höfuðborgarsvæðinu, Lögregluna á Norðurlandi eystra, Lögregluna á Suðurnesjum, Ríkislögreglustjóra, velferðarráðuneytið og sveitarfélögin Akureyri og Reykjavík. Verkefninu er stýrt af Jafnréttisstofu og stendur yfir frá 1. apríl 2017 til 30. september 2019.
Organizer: Jafnréttisstofa
Submitted by: Jafnrettisdagatal
This event for iCaliCal    Share
18.10.2018 10:00-16:00
Conference
Reykjavík, Iceland